Kvernbit IL si ro og seglgruppe, Holsnøy kystlag, Vestland Fylkeskystlag og Kystkultur.no inviterer til Den Store Roen 2021. Den Store Roen går av stabelen helga fredag. 20. august til sundag 22. august. Årets rotur skjer i området frå Rossland/Vikebø, Ypso og Herdla mellom Holsnøy og Askøy.
Invitasjon og program for Den Store Roen 2021
Hei alle roarar!
Det nærmar seg tid for Den store roen 2021. Roturane blir i sjøområdet mellom Herdlefjorden og Hjeltefjorden, mellom Holsnøy og Herdla med overnatting på/ved Herdla fort og kulturkveld på Herdla museum. Ro og seglgruppa i IL Kvernbit er arrangør i samarbeid med Holsnøy kystlag, Vestland fylkeskystlag og Kystkultur.no.
Kurs i Oselvarsegling/tradisjonsbåtsegling. I samband med Den store roen arrangerar IL Kvernbit ro og seglgruppe minikurs med i segling på Ieosen fredag frå klokka 1500 – 2000.
Ta med: mat og drikke og klé for dagens vér og vind. Utlån av flytevester men ta gjerne med eigen.
Overnatting i telt på Ypsøy frå fredag til laurdag. Tilgang på toalett og ferskvatn.
Laurdag 21. august
Deltakarar kan anten starta og avlutta turen på Herdla på Askøysida eller frå Io på Holsnøy frå Alver-sida. Sjøsetjing av båtar frå tilhengar skjer anten ved Herdlesund på Herdla eller Iden Marina på Io i tidsrommet frå 0900-1100. Parkering av bil og tilhengar: på parkeringsplassen til det gamle museet på Herdla. På Io: på Bergen og Omland Friluftsråd (BOF) sin parkeringsplass. Dette vert skilta, sjå elles kartet for Den Store Roen.
Roarar som skal vera med i båtar som arrangøren stiller til rådvelde:
Frammøte på Io kaien kl. 10.30. Ein kan ta buss 340 (344) frå Flatøy terminal kl. 9.42 (til Vikebø (ved Rossland skule).
Herfrå bil og båttransport til Ypsøy. -Ypsøy kystgard kl. 11.00
Ro-avgang frå Herdlesund når båtane er klare, ideelt sett mellom 1030 og 1100.
Ro-avgang for båtane som kjem frå Ypso eller Iden Marina klokka 1100.
Ca 1130-1145: Samling av alle båtane i Eikelandsvika på Holsnøy.
Ca. klokka 1200: På Eikeland vert det omvisning og lokal historie-formidling om kyrkjegarden ved Lena Eikeland Kutschera.
Deretter vert det kort rotur til Ypso og me tar matpause der.
Vitjing og omvisning på Ypsøy kystgard ved Vigleik Ypsøy som driv kystgarden med sauer og skuleelevar som treng annleis skuledagar. Kort spasertur på øya.
Avgang frå Ypso omlag klokka 1430-1445.
Roing nordover på anten aust- eller vestsida av Ypso.
Frå ca 1530-1700: Rotur med fugleperspektiv i øyriket søraust for Herdla.
Orientering og strandhogg ved ornitolog Lars Ågren.
Me går i land på Herdla på stranda nedom fellesfjøset (200-300 meter nordom Lakseneset)
Landsetjing av båtane på stranda oppom flomålet. Det er full fjære klokka 1700. Større båtar kan ein alternativt leggja for ile. Fortøying av evt. følgebåtar kan skje i Herdlevågen.
Ca. klokka 1800: felles middag på Herdla museum - gryterett med ris.
Etter middagen vert det kulturkveld på museet frå ca. 1900-2100.
Då Sjøvegen var hovudvegen
Tida då båten med årar og segl batt samfunnet saman. Eit nærfokus på samfunnslivet i Herdla kommune. Kåseri ved historikar Egil Ertresvaag. m.a. medforfattar av Strilesoga band.5.
Båtrya - fiskaren sin sovepose
Ryer og åkle var i gamle dagar, i tillegg til sengklede, overlevingsutstyr i naturen. Båtryene til fiskarane nordover langs kysten er viden kjende. Dei var og kjærkomne i skyssbåtar over fjordane og som sengjaplagg heime på gardane.
Miniutstilling av båtryer laga av Kristi Skintveit - sjå www.kristianevev.no
Orientering om båtryer ved sosialantropolog Leif Johnsen
Herdla som fuglereservat
I august er Herdla ein viktig stoppestad for trekkfuglar på veg sørover. Herdla er det viktigaste fuglereservat i Vestland fylke.
Bilde og video ved ornitolog, naturvegleiar og omvisar ved Herdla museum, Lars Ågren.
Fellesnaust - eit nytt liv for dei klinkbygde tradisjonsbåtane Ved å etablera fellesnaust midt i bygd og by kan fleire få oppleva gleda som tradisjonsbåtane kan gje oss.
Bilde og video ved Kjell Magnus Økland, dagleg leiar for Kystkultur.no og forfattar av boka Oselvar - den levande båten
Etterpå vert det sosial drøs. Telting skjer på grasbakken utanfor museet. Tilgang til toalett og vatn.
For dei som vil ha overnatting under tak:
Herdla Ferie og Fritid ved Herdlesund kan ha ledige rom. Ring på 93 00 65 50.
Deltakarar frå Den Store Roen kan liggja på slonkabol i Skråmestø bygdehus, omlag 6 km sør for museet. Ta med madrass og sovepose. Tilgang til kjøkken og toalett. Arrangør kan tilby biltransport til og frå bygdehuset. Pris: 100 kr per person. Brukarane må rydde opp etter seg.
Sundag 22. august
-Rotur rundt Herdla - obs - vèravhengig
- Strandhogg og matpause på friområdet på Skarvøy. Tilgang til toalett.
- Orientering om Skarvøy og området rundt si militære fortid, ved Gunnar Furre, styrar på Herdla museum
- Me ror på oppdagingsferd mellom Kobbevåg i aust og Hjeltefjorden i vest
-Returrotur attende til anten Herdla eller Io
- Landsetjing av båtar og heimreise
Vi reknar med at folk kan vera i land eller i transportbåt og klar til heimreise ca. kl. 1600.
Merk at det kan skje at vèr og vind fører til at rekkefølgen lyt stokkast om her og der.
For dei som ikkje har eigen båt er det eit avgrensa tal plassar tilgjengeleg i lånebåtar.
Viktige ting å ha med i båten: fangline både bak og framme, anker/ilestein og iletau. Viktige ting å ha med på land: telt, liggjeunderlag/madrass, sovepose.
Pris pr. deltakar kr. 400 inkl. fellesmiddag laurdag og deltaking på kulturkveld.
Kvernbit IL Ro og seglgruppe har nokre plassar ledig i sine båtar. Ta kontakt med Atle Bergseth om dette.
Med atterhald om at arrangementet kan skje under gjeldande smitteverntiltak.
