Vedtekter
§ 1. Namn
Stiftinga Kystkultur no!
§ 2. Føremål
STIFTINGA KYSTKULTUR NO! er ei ikkje-næringsdrivande stifting med føremål å stimulere og verke som pådrivar og fagleg instans for utvikling av kystkulturtilbod og koordinering av kystkultur i Vestlandsregionen.
§ 3. Kapital
Stiftinga har grunnkapital på kr. 280 000,-
§ 4. Representantskap
Stiftinga skal ha eit representantskap, samansett ved at fylket og kvar av medlemskommunane oppnemner ein medlem kvar.
Representantskapet sine medlemmer vert oppnemnde for 4 år.
Representantskapet skal ha ein leiar og ein nestleiar som vert valde av og blant representantskapet sine medlemmer ved byrjinga av fireårsperioden.
Medlemmer av representantskapet kan ikkje veljast til styret.
Representantskapet sin leiar møter i styret med tale og forslagsrett, men ikkje røysterett.
§ 5. Representantskapet sine oppgåver
Representantskapet skal:
- velje stiftinga sitt styre og revisor
- gje uttale til stiftinga si årsmelding og årsrekneskap.
- fastsetje eventuelt honorar for styret.
- gje uttale til styret i saker som gjeld drift av stiftinga.
- føre tilsyn med at stiftinga vert driven i samsvar med lov, vedtekter og vedtak fatta av representantskapet.
- gjere vedtektsendringar etter forslag frå styret, jfr § 8.
§ 6. Representantskapet sine møter
Representantskapet held møte minst ein gong i året, og elles når leiaren eller minst 2/5 av medlemmene krev det. Leiaren kallar inn til møta med minst 21 dagars varsel. Innkallinga skal vere skriftleg, og sakene som skal handsamast skal nemnast i møteinnkallinga.
Leiaren leier møta. Dersom leiaren ikkje kan møta, leier nestleiaren møtet.
Dersom ingen av dei kan møta, vert møteleiar valt ved byrjinga av møtet.
Representantskapet er vedtaksført når meir enn 50 % (halvparten) av dei oppnemnde medlemmene er til stades. Ein oppnemnt medlem som ikkje kan møte, har høve til å gje fullmakt. Underskriven fullmakt skal leggjast fram på møtet for godkjenning av Representantskapet. For gyldig vedtak må fleirtalet av dei frammøtte ha stemt for framlegget. Ved eventuell stemmelikskap har møteleiaren dobbeltstemme.
Vert representantskapsmøtet ikkje vedtaksført pga manglande frammøte, skal leiaren kalla inn til nytt møte med minst 7 dagars varsel og med same dagsorden som for det første ordinære møtet.
Representantskapsmøtet innkalla i samsvar med dette avsnittet er vedtaksført når minst 2/5 av representantskapsmedlemmene er til stades.
Det er høve til å møte med fullmakt etter same retningsliner som ovanfor.
Det skal førast protokoll over vedtaka. Protokollen skal underskrivast av møteleiar og ein medlem oppnemnd på møtet.
Stiftinga sitt styre og dagleg leiar kan møte på representantskapsmøtet med tale- og forslagsrett.
§ 7. Styret
Styret er stiftinga sitt høgste organ. Stiftinga skal ha eit styre på 5 medlemmer, samt to varamedlemmer, valde av representantskapet for fire år. Valet skjer ved fleirtalsval. Ved stemmelikskap vert valet avgjort ved loddtrekning.
Styret skal leie drifta av stiftinga, tilsetje dagleg leiar og arbeide ut arbeidsinstruks for stillinga. Styret har ansvar for at drifta skjer i samsvar med lov, vedtekter og vedtak gjort av representantskapet.
Styret vel sjølv leiar.
Styret er vedtaksført når 3 av styret sine 5 medlemmer er til stades. Ved styreleiaren sitt fråvære vel styret ein setteleiar. Vedtak i styret krev vanleg fleirtal. Ved stemmelikskap har styreleiaren dobbelstemme.
Styret kan gjennom styrevedtak gje styreleiar tilgang til å forplikte stiftinga, og styret kan gje prokura.
§ 8. Vedtektsendring
Representantskapet kan, med tilslutnad frå minst 2/3 av dei oppnemnde medlemmene, vedta å endre desse vedtektene etter forslag frå styret.
§ 9. Oppløysing
Representantskapet kan, med tilslutnad frå 2/3 av dei oppnemnde medlemmene, vedta å oppløyse stiftinga etter forslag frå styret. Vedtak om oppløysing må skje etter reglane i LOV 2001-06-15 nr. 59: Lov om stiftelser § 52.
§ 10. Anna
Ut over desse vedtektene gjeld Lov om stiftelser.
Sist revidert 25. april 2019
Børge Haugetun
Styreleiar
Nina Bognøy Beate Husa
Hallvard Opedal Jorunn Skåden
Godkjent av Stiftingstilsynet 14. november 2019.